Ánægjuleg frétt

Ánægjulegar fréttir að nú eigi loks að tvöfalda Vesturlandsveg frá Kjalarnesi til Borgarness.

Af því tilefni má ég til með að benda á tvær greinar sem ég ritaði nýlega í Blaðið um glímuna sem við svo mörg eigum við trukkana á þessum vegi.

Skattleggjum trukkana út af vegunum

Hefnd trukkana

Þetta er svona.

Gert ráð fyrir tvöföldun Vesturlandsvegar að Borgarnesi

Ísland greiðir fyrir stækkun ESB

Þetta mátti sjá fyrir. Í haust birti ég grein í ráðstefnuritinu Rannsóknir í félagsvísindum VII sem Háskóli Íslansds gefur út. Þar sagði ég að Ísland hefði veika samningsstöðu og myndi á endanum þurfa að greiða fyrir stækkun ESB.

Sjá grein: http://www.bifrost.is/kennarar/2006/default.asp?sid_id=28309&tId=1

Þetta er svona.

ESB gerir alvöru úr hótunum gagnvart EFTA-ríkjum

Ekki var það mikið

Ekki reyndist nú margt bitastætt koma fram um aðgerðir af hálfu ríkisstjórnarinnar til að lækka matvælaverð.

Til viðbótar við smáskammtalækkun tolla sem kynnt var um daginn á, svo gott sem, að láta duga að fylgjast með verðlagsþróun. Sem er svo sem gott og blessað, en mun duga skammt.

Eina leiðin til lækka matvælaverð að einhverju viti er að losa mun betur um viðstkipahöftin. Þetta vita menn auðvitað. En ...

Þetta er svona.

Miklu magni upplýsinga um verðlagsbreytingar safnað saman

Evrópumet í háu matvælaverði

Það verður spennandi að sjá hverju ríkisstjórnin ætlar að spila út á þessum blaðamannafundi (sjá tengil að neðan) til að tryggja lækkun matvælaverðs.

Landbúnaður á Íslandi er ein aflokaðasta atvinnugrein í heimi.

Afleiðingin af þessari landbúnaðarstefnu innilokunnarer er að að Ísland á Evrópumet í háu matarverði. Matvælaverð á Íslandi er það dýrasta í allri Evrópu, - og þótt víðar væri leitað.

Árið 2005 var verð á matvælum og óáfengum drykkjarvörum 62 prósent yfir meðalverði í Evrópusambandinu.  Noregur mældist næst á eftir Ísland, 52 prósent yfir meðaltalinu. Sviss kom þar á eftir, 40 prósentum yfir meðaltali. Matvælaverð á þeim Norðurlandanna sem eru í ESB, og Ísland á að geta borið sig saman við, var töluvert ódýrara en á Íslandi. Þó reyndust þau öll nokkuð yfir meðaltalsverðinu. Danmörk reyndist 30 prósent yfir meðaltalsverði en matvælaverð í Svíþjóð var hins vegar aðeins tólf prósent af meðaltalsverði í ESB. Í Finnlandi verðið ívið hærra, eða 16 prósent. 
 
Upp úr nýliðnum áramótum var gengið frá nýjum samningi við ESB sem fól í sér afar takmarkaða tollalækkun, sem dugar skammt til að lækka matvælaverð hér á landi svo nokkru nemi. Það grátlega er að Framkvæmdastjórn Evrópusambandsins hefur  margoft lýst yfir áhuga á að semja við Íslendinga um mun meira frelsi í viðskiptum með landbúnaðarvörur, sem myndi gilda í báðar áttir. Ríkisstjórn Íslands hefur hingað til ekki viljað það. Himinhá vörugjöld bæta svo gráu ofan á svart.

Þetta skrýtna kerfi hefur ekki aðeins skilað einu allra hæsta matvælaverði í heimi heldur eru bændur jafnframt meðal snauðustu starfsstétta landsins.

Þetta er svona.

Ætli það sé einber tilviljun að landbúnaður er einmitt sá atvinnuvegur á Íslandi sem er hvað lokaðastur gagnvart útlöndum?

 

Boðað til blaðamannafundar um lækkun matvælaverðs

Fátt bítur á Frjálslyndum

Einhverjir halda því fram að vandræðagangurinn, úlfúðin og óreiðan í Frjálslynda flokknum muni skaða hann í kosningum.

Ég held ekki. 

Flokkurinn er nú kominn inn í þekkt mengi skoðanna, flokka sem kenna sig við þjóðernið og amast við innflytjendum. Slíkir flokkar geta búist við um það bil tíund atkvæða í okkar heimshluta, eitthvað misjafnt þó eftir löndum.

Reynslan annarsstaðar frá sýnir að kjósendum slíkra flokka er alveg sama um hvort það sé vandræðagangur, úlfúð og óreiða. Finnst það jafnvel bara betra. Kæra sig kollótta þótt þar sé misjafn sauður í mörgu fé, eins og sagt er.

Og engu skiptir hvað hinum nítíu prósentum finnst, alveg sama hvað menn hneykslast, nítíu prósentin kjósa nefnilega allt aðra flokka.

Þetta er svona.

Nei, danir láu víst ekki í því

Ég á engin orð til að lýsa þeim tilfinningalegu veðrabrigðum sem urðu á heimili mínu þegar danir stálu sigrinum í handboltanum áðan.

Þvílík vonbrigði!

Það eina sem gæti grætt sært Íslendishjartað er ef einhver útrásarvíkingurinn myndi kaupa Tívolí, strax í dag, og læti Stuðmenn spila Í bláum skugga á hverju einasta kvöldi, allt þar til við fáum annað tækifæri til að leggja kafrauða Baunana.

Hvernig er það, getum við ekki bara sett Björgólf í málið?

Draumurinn úti í Hamborg - Danir sigruðu

Nú liggja danir í því

Danir eru sannfærðir um léttan sigur í handboltanum í kvöld. Telja litla fyrirstöðu í íslenska liðinu.

Danir hafa í raun aldrei haft nokkurn skilning á því að líf geti þrifst á Íslandi, sem þeir kalla gjarnan klettaeyjuna.

Þegar ég bjó í Danmörku vildu sumir þeirra endilega ræða við mig um þann mikla fjárstyrk sem þeir voru sannfærðir um að Ísland fengi enn frá dönsku ríkisstjórninni. Voru vissir um að Danir héldu lífinu í Íslendingum með einhverskonar félagsmálaaðstoð úr danska ríkiskassanum.

Það er þess vegna sem flestir danir skilja hreinlega ekki umsvif íslensku útrásarvíkinganna í dönsku atvinnulífi.

Nú verðum við að leggja allt í sölurnar og beygja bölvaða baunana í duftið í leiknum á eftir. Þá verður svo miklu skemmtilegra að spássera um á Strikinu. Og spjalla gorgeirslega við dönsku félagana frá námsárunum.

Kostir Margrétar

Margrét Sverrisdóttir hefur spilað frábærlega úr þröngri stöðu í Frjálslynda flokknum. Þrátt fyrir að hafa aldrei gegnt stöðu kjörins fulltrúa, aðeins verið varaþingmaður og varaborgafulltrúi, hafa augu fjölmiðla verið á henni, svotil í beinni útsendingu, í þrjá heila sólahringa. Hún á nokkra góða kosti; fyrir aðra flokka hlýtur hún að vera nokkur fengur, ólíkt flestum öðrum frambjóðendum hefur hún líklega nokkurn fjölda fylgismanna sem hún getur tekið með sér. Hún gæti í raun gengið til liðs við hvaða stjórnmálaflokk sem er. Bara spurning hvað þeir geta boðið, prófkjörin sem allstaðar eru aflokin þrengja vissulega um möguleika flokkanna að bjóða henni vænlegt þingsæti. Samfylkingin hlýtur allavega að reyna að hliðra til hjá sér. Þá gæti hún einnig tekið höndum saman með Ómari Ragnarssyni og Jóni Baldvin (ef hann gerir alvöru úr framboðshugleiðingum sínum hjá Agli um helgina) ásamt öðrum í hópnum sem skipa Framtíðarlandið.

Allavega spennandi staða.

Margrét telur sér ekki fært að starfa lengur í Frjálslynda flokknum

Er allt að verða vitlaust?

Moggabloggið er þjált og þægilegt tæki, líka fyrir menn eins og mig sem eru svolítið tæknihaltir.

Svo virðist sem allt sé að verða vitlaust í stjórnmálalífi landsins í aðdraganga kosninga, því getur verið gaman að hafa vettvang sem þennan til að taka þátt í blaðrinu.

Frjálslyndi flokkurinn hefur lagt sig inn í þekkt mengi hægri þjóðernisflokka og í það minnsta þrír nýir hópar boða framboð, svokallað Framtíðarland og tveir hópar myndaðir úr allsvipuðu samkrulli aldraðra og öryrkja. Hingað til hef ég ekki talið að Framtíðarlandið ætti mikla möguleika. Hipp og kúl framboð úr 101 Reyjavík höfðar ekki mikið út fyrir eigin hóp. En ef við bætast þungaviktarmenn á borð við Jón Baldvin (sem fór mikinn í Silfri Egils í gær) og Ómar Ragnarsson (sem hefur farið mikinn í marga mánuði) lítur dæmið allt öðru vísi út.

Þá gæti dregið til tíðnda íslenskum stjórnmálum.

Íslenski þjóðarflokkurinn

Þegar fram kom um daginn tillaga að breyta nafni Frjálslynda flokksins í Flokk Frjálslyndra jafnaðarmanna gerði ég (á minni fyrri bloggsíðu) við það athugasemd. Þótti skrýtið að flokkur sem hvorki er frjálslyndur né jafnaðamannaflokkur vilji kenna sig við hvoru tveggja. Benti einnig á að þetta nafn er auðvitað löngu frátekið. Félag frjálslyndra jafnaðrmanna er nefnilega starfandi sem eitt aðildarfélaga Samfylkingarinnar og var þar áður hluti af Alþýðuflokknum eftir að Bandalag jafnaðarmanna gekk til liðs við þann ágæta flokk. Í færslunni stakk ég uppá flokkurinn gæti frekar tekið upp nafnið  Þjóðernissinnaðir íhaldsmenn. Þegar betur er að gáð er hins vegar annað nafn kannski mun nær lagi. Frjálslyndi flokkurinn sver sig í ætt við Danska þjóðarflokkinn og aðra þeim líka, því liggur kannski beinast við að taka upp nafnið Íslenski þjóðarflokkurinn. Eða hvað?